ସମନ୍ୱିତ ଶିଶୁ ବିକାଶ ପ୍ରକଳ୍ପର ବିକଳ ଚିତ୍ର, କେଉଁଠି ଅଧୁରା ପଡିଛି ତ କେଉଁଠି ହସ୍ତାନ୍ତର ହୋଇନି।।

କେସିଙ୍ଗା,୧୭.୦୩.୨୦୨୫ - କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ ସମନ୍ୱିତ ଶିଶୁ ବିକାଶ ପ୍ରକଳ୍ପ ଅଧିନରେ ପରିଚାଳିତ ହେଉଥିବା ଅନେକ ଅଙ୍ଗନବାଡି କେନ୍ଦ୍ରର ନିଜସ୍ୱ ବିଲଡିଙ୍ଗ ଆଜି ପର୍ଯ୍ୟନ୍ତ ହୋଇପାରିନାହିଁ । କେସିଙ୍ଗା ଆଇସିଡିଏସ୍ ଅଧିନରେ ବ୍ଲକର 26ଗୋଟି ପଞ୍ଚାୟତରେ 176ଗୋଟି ଏବଂ କେସିଙ୍ଗା ଏନଏସିର 12 ଗୋଟି ୱାର୍ଡ ରେ 21ଟି ଅଙ୍ଗନବାଡି କେନ୍ଦ୍ରକୁ ମିଶାଇଲେ  ସର୍ବମୋଟ 195ଗୋଟି ଅଙ୍ଗନବାଡି ରହିଛି । ସେଥିମଧ୍ୟରୁ ଅଧିକାଂଶ କେନ୍ଦ୍ରର ନିଜସ୍ୱ ବିଲଡିଙ୍ଗ ଆଜି ପର୍ଯ୍ୟନ୍ତ ନିର୍ମାଣ ହୋଇପାରି ନଥିବା ବେଳେ ଆହୁରି ଅନେକ ଅଙ୍ଗନବାଡି କେନ୍ଦ୍ରର ରକ୍ଷଣାବେକ୍ଷଣ ଓ ମରାମତି ଅଭାବରୁ ଶୋଚନୀୟ ହୋଇପଡିଛି ।

ନିଜସ୍ୱ ଗୃହ ନଥିବା ଅଙ୍ଗନବାଡି କେନ୍ଦ୍ର ଗୁଡିକ ନିକଟସ୍ଥ ବିଦ୍ୟାଳୟ, ଗୋଷ୍ଠୀକେନ୍ଦ୍ର ତଥା ଅଙ୍ଗନବାଡି କର୍ମୀଙ୍କ ନିଜ ଘରେ ପରିଚାଳିତ ହେଉଛି । ଅପରପକ୍ଷେ, କେତେକ ସ୍ଥାନରେ ଅଙ୍ଗନବାଡି ଗୃହ ନିର୍ମାଣକାର୍ଯ୍ୟ ସମ୍ପର୍ଣ୍ଣ ହୋଇଥିଲେ ସୁଦ୍ଧା ତାହା କାର୍ଯ୍ୟକ୍ଷମ ନ ହୋଇ ପଡିରହିଛି । ଯାହାର ଜ୍ୱଳନ୍ତ ଉଦାହରଣ ହେଉଛି ସିରୋଲ ପଞ୍ଚାୟତ ଅନ୍ତର୍ଗତ ପୋଢଖମ୍ୱ ମାଝିପଡାରେ ନୂତନ ଭାବେ ନିର୍ମାଣ ହୋଇଥିବା ଅଙ୍ଗନବାଡି କେନ୍ଦ୍ର ଆଜିଯାଏ କାର୍ଯ୍ୟକ୍ଷମ ହୋଇପାରିନାହିଁ ।

ସେହିପରି କାଣ୍ଡେଲ ସେକ୍ଟର ଅଧିନସ୍ଥ ରେଙ୍ଗାଲି, ବାଲସି ଭଳି ଅନ୍ୟାନ୍ୟ ଅଙ୍ଗନବାଡି କେନ୍ଦ୍ର ଶୋଚନୀୟ ହୋଇପଡିଛି । ସେହିପରି ଫଟକାମାଲ ପଞ୍ଚାୟତ ଅଧିନସ୍ଥ ବୋରିଙ୍ଗପଦରସ୍ଥିତ ଅଙ୍ଗନବା଼ଡି କେନ୍ଦ୍ର – ଖ ଗତ 2016 ମସିହାରୁ ଆରମ୍ଭ ହୋଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ତାହାର ନିଜସ୍ୱ ବିଲଡିଙ୍ଗ ନାହିଁ । ଏଠାରେ ଅଙ୍ଗନବାଡି କର୍ମୀଙ୍କ ଘରେ କୁନି କୁନି ଶିଶୁମାନଙ୍କୁ ନେଇ ପ୍ରାକବିଦ୍ୟାଳୟ ତଥା ପ୍ରକଳ୍ପର ଅନ୍ୟାନ୍ୟ କାର୍ଯ୍ୟକ୍ରମ ଚାଲୁଛି ।

ଏହି ଅଙ୍ଗନବାଡି କେନ୍ଦ୍ର ପାଇଁ ବିଲଡିଙ୍ଗ ନିର୍ମାଣ କାମ କେସିଙ୍ଗା ବ୍ଲକ ପକ୍ଷରୁ ଗତ 5ବର୍ଷ ତଳେ ଆରମ୍ଭ କରାୟାଇଥିଲେ ସୁଦ୍ଧା ତାହା ଆଜିପର୍ଯ୍ୟନ୍ତ ଅସମ୍ପୂର୍ଣ୍ଣ ଅବସ୍ଥାରେ ପଡିରହିଛି । କେବଳ ଛାତରେ ହିଁ ସୀମିତ ରହିଯାଇଛି ହେଲେ, ବିଲଡିଙ୍ଗ ନିର୍ମାଣ ସମ୍ପୂର୍ଣ୍ଣ କରିବାରେ କାହିଁକି ବିଳମ୍ୱ କରାଯାଇଛି ତାହା ସନ୍ଦେହ ସୃଷ୍ଟି କରୁଛି । ଏ ବିଷୟରେ ବ୍ଲକ ସହକାରୀ ଯନ୍ତ୍ରୀ ସୁକୃତାନନ୍ଦ ମିଶ୍ରଙ୍କୁ ପଚାରିବାରୁ ସେ କହିଥିଲେ, କଣ ପାଇଁ ଅସମ୍ପୂର୍ଣ୍ଣ ହୋଇ ରହିଛି ସେ ନେଇ ମୋ ପାଖରେ ତଥ୍ୟ ନାହିଁ, ତାହାର ଫାଇଲ ମାଗିଛି ବୋଲି କହିଥିଲେ । 

ସେହିପରି କେସିଙ୍ଗା ଏନଏସି ୱାର୍ଡ ନଂ.8 ଅନ୍ତର୍ଗତ ବୋରିଙ୍ଗପଦରରେ ନିର୍ମାଣାଧୀନ ଅଙ୍ଗନବାଡି କେନ୍ଦ୍ର ଦୀର୍ଘବର୍ଷ ହେଲା ଅସମ୍ପୂର୍ଣ୍ଣ ଅବସ୍ଥାରେ ପଡିରହିଛି ଯାହାକି ପ୍ରଶାସନ ଜାଣିଅଜଣା ଭଳି ରହୁଥିବା ପରିଲକ୍ଷିତ ହେଉଛି । ଏହିଭଳି ବ୍ଲକ ଓ ଏନଏସି ଅଞ୍ଚଳରେ ରହିଥିବା ଅନେକ ଅଙ୍ଗନବାଡି କେନ୍ଦ୍ର ବିଲଡିଙ୍ଗ କେଉଁଠି ଅଧୁରା ପଡିରହିଛି ତ ଆଉ କେଉଁଠି ବିଭାଗକୁ ହସ୍ତାନ୍ତର ହୋଇପାରି ନାହିଁ ।

ତେଣୁ ମୋଟାମୋଟି ଭାବେ କହିବାକୁ ଗଲେ ଅଙ୍ଗନବାଡି କେନ୍ଦ୍ର ଯେଉଁ ମହତ୍ ଉଦ୍ଦେଶ୍ୟ ନେଇ କାର୍ଯ୍ୟକରୁଛି ତାହା ଭିତ୍ତିଭୂମି ଅଭାବରୁ କେସିଙ୍ଗା ବ୍ଲକରେ ଦିଗହରା ହୋଇପଡିଛି ବୋଲି ଅଭିୟୋଗ ହେଉଛି । ଏଥିପ୍ରତି ଜିଲ୍ଲାପ୍ରଶାସନ ସ୍ୱତନ୍ତ୍ର ଦୃଷ୍ଟି ଦେଇ ବିହୀତ ପଦକ୍ଷେପ ନେବାକୁ ସାଧାରଣରେ ଦାବୀ ହେଉଛି । ଅପରପକ୍ଷେ ଏ ବିଷୟକୁ ନେଇ କଳାହାଣ୍ଡି ଜିଲ୍ଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଦୟାମୟ ପାଢୀଙ୍କ ପ୍ରତିକ୍ରିୟା ନେବାରୁ ତଦନ୍ତ କରାଯାଇ ପଦକ୍ଷେପ ନିଆଯିବ ବୋଲି କହିଛନ୍ତି ।